தேசிய விளையாட்டுக்குள் ஒரு திகில்!

கிறிஸ்துமஸ் தினத்தன்று அமெரிக்காவில் வெளியாகியிருக்கும் ஹாலிவுட் படம் கன்கஷன் (Concussion). அமெரிக்காவின் பாக்ஸ் ஆபீஸ் வசூலில் ஏழாம் இடத்தைப் பிடித்திருக்கிறது இந்தப் படம். பீட்டர் லேண்டெஸ்மேன் இயக்க ஹாலிவுட்டின் ஆற்றல்மிக்க நடிகர் எனச் சொல்லப்படும் வில் ஸ்மித் நடித்திருக்கும் இந்தப் படம் விளையாட்டு வீரர்களைத் தாக்கக்கூடிய வியாதியான சிடிஇ பற்றி விவாதிக்கிறது. சிடிஇ என்பது தலைமீது ஏதேனும் தொடர்ந்து வலுவாக மோதுவதால் மூளையில் ஏற்படும் அதிர்ச்சியால் உருவாகும் ஒருவித நோய். இந்த நோயைக் கண்டறிந்தவர் நைஜீரியாவைச் சேர்ந்த நோயியல் நிபுணரான டாக்டர் பென்னெட் ஒமாலு.

டாக்டர் பென்னெட் ஒமாலுவின் வேடத்தைத்தான் வில் ஸ்மித் இந்தப் படத்தில் ஏற்று நடித்திருக்கிறார். டாக்டர் பென்னெட் ஒமாலு அமெரிக்க தேசியக் கால்பந்துக் கழகத்துக்குப் பெரும் சவாலாக இருந்தவர். விளையாட்டு வீரர்களுக்கு மூளையில் ஏற்படும் மாற்றங்களைப் பற்றிய அவருடைய ஆய்வை முடக்குவதற்கான முயற்சியை அமெரிக்க தேசியக் கால்பந்து கழகம் மேற்கொண்டது. ஏன்? அமெரிக்காவின் தேசிய விளையாட்டு கால்பந்து. அமெரிக்க தேசியக் கால்பந்துக் கழகம் ஆண்டுதோறும் ஏராளமான வருமானத்தை ஈட்டுகிறது. 2013-ம் ஆண்டு அது ஈட்டிய வருமானம் 9 பில்லியன் டாலர் என்று புள்ளிவிவரம் ஒன்று குறிப்பிடுகிறது.

ஆனாலும் தனது முயற்சியில் தளராத டாக்டர் சிடிஇ பற்றிய தனது ஆய்வை வெற்றிகரமாக முடித்தார். அவருடைய வாழ்க்கைச் சம்பவங்களை அடிப்படையாகக் கொண்டுதான் இந்தப் படத்தின் திரைக்கதை உருவாக்கப்பட்டிருக்கிறது. பயோபிக் வகை திரில்லராக தயாரிக்கப்பட்டிருக்கும் இந்தப் படம் இந்தியாவில் 2016 பிப்ரவரி 5 அன்று வெளியாக இருக்கிறது.

அமெரிக்க தேசியக் கால்பந்தாட்ட வீரர்களில் 96 சதவீதத்தினருக்கு சிடிஇ வியாதிக்கான அறிகுறி இருப்பதாக ஓர் ஆய்வு தெரிவிக்கிறது. இந்நிலையில் இந்தப் படம் அமெரிக்கப் பெற்றோர்களின் மத்தியில் பெரிய அதிர்ச்சியை ஏற்படுத்தியிருக்கிறது. அமெரிக்காவில் சிடிஇ பாதிப்பு பற்றிய விழிப்புணர்வை இந்தப் படம் ஏற்படுத்தும் என்ற நம்பிக்கை நிலவுகிறது. இப்படியான பல சுவாரசியமான, அதிர்ச்சிதரத்தக்க சம்பவங்களைக் கதைக்களமாகக் கொண்ட கன்கஷன் இங்கேயும் அத்தகைய அதிர்ச்சிகளை ஏற்படுத்துமா என்று பார்ப்போம்.

ஜனவரி 1 தி இந்து நாளிதழில் வெளியானது

உறைய வைக்கும் கதையில் கான் கேர்ள் நாயகி!

அமெரிக்கத் திகில் படமான ‘ரிடர்ன் டு சென்டர்’ இங்கிலாந்தில் மே மாதமே வெளியாகிவிட்டது. அமெரிக்காவில் வரும் ஆகஸ்ட் 14 அன்று வெளியாக இருக்கிறது. ஒரு சிறு நகரத்தில் மிராண்டா வெல்ஸ் நர்ஸாகப் பணியாற்றிவருகிறார். இயல்பான வாழ்க்கை நடத்திவரும் அவருக்குத் தோழி ஒருவரின் தூண்டுதல் மூலமாக விநோதமான ஆசை ஒன்று வருகிறது. அறிமுகமற்ற ஒருவருடன் டேட்டிங் போக வேண்டும் என முடிவுசெய்கிறார். கெவின் என்னும் நபரையும் சந்திக்க முடிவுசெய்து டேட்டிங்குக்கு வரச் சொல்கிறார்.

டேட்டிங் நாளன்று மிராண்டா கிளம்பிக்கொண்டிருக்கிறார். அப்போது வெளியே சத்தம் கேட்கிறது. சென்று பார்க்கிறார். ஒரு நபர் நிற்கிறார். அவர் தான் கெவின் என நினைத்து உள்ளே அழைத்து வருகிறார். ஆனால் வந்தவரின் நடவடிக்கைகள் விநோதமாக இருக்கின்றன. அவரைத் தவிர்க்கும் முன்னர் அந்த நபரால் பாலியல் வல்லுறவுக்கு ஆளாகிறார் மிராண்டா. பின்னர் அந்த நபர் ஓடி ஒளிந்துவிடுகிறார்.

இப்போது வேறொருவர் வருகிறார். அவர்தான் கெவின். மிராண்டா டேட்டிங்குக்கு ஒப்புதல் தந்த நபர் என்பது புரிகிறது. முதலில் வந்த வில்லியம் ஃபின் என்பவரை போலீஸ் கைது செய்து சிறையிலடைக்கிறது. இயல்பான வாழ்க்கைக்குத் திரும்ப மிராண்டா முயல்கிறார். இதனிடையே சிறையில் இருக்கும் வில்லியமுக்கு மிராண்டா கடிதம் எழுதுகிறார். ஒவ்வொரு முறையும் கடிதம் திரும்பி வருகிறது. விடாமல் கடிதத்தைத் தொடர்ந்து அனுப்புகிறார் மிராண்டா. இறுதியில் வில்லியம், மிராண்டா இருவருக்குமிடையே நட்பு உருவாகிறது.

சிறையிலிருந்து வெளியே வரும் வில்லியம் அடிக்கடி மிராண்டாவின் வீட்டுக்கு வருகிறார். இருவருக்குமிடையே விளையாட்டுக் காதல்கூட ஏற்படுகிறது. வீட்டுக்கு வரும் வில்லியமை வீட்டுக்குள் மிராண்டா அனுமதிப்பதில்லை. ஒரு நாள் அனுமதிக்க வேண்டிய சூழல் ஏற்படுகிறது. அப்போது பார்வையாளர்களை அதிரவைக்கும் சம்பவம் ஒன்று நிகழ்கிறது. அது என்ன என்பதே படத்தின் சுவாரஸ்யமான திருப்பம்.

கான் கேர்ள் படத்தில் அசத்திய ரோஸமண்ட் பைக் மிராண்டாவாக நடித்துள்ளார். ஹல்க், ஹோட்டல் ருவாண்டா போன்ற படங்களால் அறியப்பட்டிருக்கும் நிக் நால்டே மிராண்டாவின் தந்தையாகவும் வில்லியமாக ஷைலோ ஃபெர்னாண்டஸும் நடித்திருக்கிறார்கள். உணர்வும் திகிலும் அலைமோதும் படத்தைப் பார்க்க விரும்புபவர்களுக்கானது இந்தப் படம்.

ஆகஸ்ட் 14 தி இந்து நாளிதழில் வெளியானது

மனதை மயக்கும் மாயப் புதிர்

ஹங்கேரியைச் சேர்ந்த கட்டடக் கலைப் பேராசிரியர் எர்னோ ரூபிக் 1974-ல் ஒரு புதுமையான, புதிரான கனச் சதுரத்தை உருவாக்கினார். இதை உடைக்கவோ பிரிக்கவோ முடியாது. ஆனால் தனித்தனியாகச் சுற்றும் வகையில் அமைக்கப்பட்டிருந்தது. இதில் வண்ணமயமான ஸ்டிக்கர்களை ஒட்டி இதை ஒரு விளையாட்டுப் பொருளாக்கினார். முதலில் உருவாக்கப்பட்ட ரூபிக் கனச்சதுரம் (Rubik's Cube) இதுதான். 

ஒரே மாதிரியான நிறங்களை ஒரே பக்கத்தில் கொண்டுவரும் தனது புதிரை விடுவிக்க அவருக்கு ஒரு மாதம் ஆனது. உலகத்திலேயே மிக அதிகமாக விற்பனையாகும் விளையாட்டுப் பொருளாக ரூபிக் கனச்சதுரத்தை உருவாக்க ஆசைப்பட்டார். ஒருசில மாற்றங்களை இதில் ஏற்படுத்திய பின்னர் மிகவும் பிரபலமான விளையாட்டுப் பொருளானது ரூபிக் கனச்சதுரம். முதலில் தன் மாணவர்களிடமும் நண்பர்களிடமும் இதை அறிமுகப்படுத்தினார்.  முதன் முதலில் பொலைட்செனிகா என்னும் நிறுவனம் ரூபிக் கனச்சதுரத்தைத் தயாரித்து விநியோகித்தது. 

தொடக்க காலத்தில் தயாரிக்கப்பட்ட ரூபிக் கனச்சதுரம் ’மாஜிக் க்யூப்’ என அழைக்கப்பட்டது. எடையும் இரு மடங்கு அதிகமாக இருந்தது. ஹங்கேரியில் பிரபலமாகியிருந்த இந்த ரூபிக் கனச்சதுரத்தை கணித அறிஞர்கள் உலகெங்கும் நடைபெற்ற கருத்தரங்குகளுக்கு கொண்டுசென்றனர். 1979-ல்  நுரெம்பெர்க் விளையாட்டுப் பொருள் கண்காட்சிக்கு இது கொண்டுபோகப்பட்டது. அப்போது அங்கே வந்திருந்த டாம் க்ரெமெர் என்னும் விளையாட்டுப் பொருள் நிபுணர் உலகம் முழுவதிலும் இதை விற்கச் சம்மதித்தார். இதைத் தொடர்ந்து ஐடியல் டாய் நிறுவனம், மேஜிக் க்யூப் என்னும் பெயரை ரூபிக் நினைவாக ரூபிக் க்யூப் என மாற்றி விநியோகித்தது. 

1980-ல் இது உலகச் சந்தையில் அறிமுகமானது. அந்த ஆண்டு ஜெர்மனியின் சிறந்த விளையாட்டுக்கான விருதைப் பெற்றது. உலகத்தில் இதுவரை விற்பனையான ரூபிக் கனச்சதுரத்தின் எண்ணிக்கை 35 கோடி என்கிறார்கள்.  இன்று உலகத்தில் மிக அதிகமான விற்பனையாகும் விளையாட்டுப் பொருள் இதுதான். 40 ஆண்டுகளைத் தாண்டியும் வெற்றிநடைபோடுகிறது இந்தக் கனச்சதுரப் புதிர்.