த பீனட்ஸ் மூவி

குழந்தைகளை உற்சாகப்படுத்திய ஹாலிவுட் படம் ஐஸ் ஏஜ். இந்த வரிசையில் நான்கு படங்கள் வெளியாகியிருக்கின்றன. ஐந்தாம் பாகம் அடுத்த ஆண்டு வெளியாகும் எனத் தெரிகிறது. ஐஸ் ஏஜின் நான்காம் பாகமான ஐஸ் ஏஜ்: காண்டினெண்டல் டிரிஃப்டை மைக் துர்மியருடன் இணைந்து இயக்கிய ஹாலிவுட் இயக்குநர் ஸ்டீவிவ் மார்டினோ. மிகப் பெரும் வெற்றிபெற்ற இந்தப் படத்தைத் தொடர்ந்து இவரது இயக்கத்தில் அடுத்து ஒரு அசத்தலான அனிமேஷன் படம் வெளியாக உள்ளது. 3டியில் வெளியாகும் த பீனட்ஸ் மூவி என்னும் படம் தரப் போகும் அனுபவத்தை எதிர்கொள்ள ரசிகர்கள் ஆர்வத்துடன் இருக்கிறார்கள் என்பது அதன் டிரெயிலருக்குக் கிடைத்திருக்கும் அமோக வரவேற்பைப் பார்த்தாலே தெரிகிறது.

ப்ளு ஸ்கை ஸ்டுடியோஸ் நூறு மில்லியன் டாலர் செலவில் தயாரித்திருக்கும் இந்தப் படத்தை ட்வெண்டியத் செஞ்சுரி ஃபாக்ஸ் நிறுவனம் விநியோகம் செய்கிறது. சார்லஸ் எம் சல்ஸ் எழுதிய காமிக்ஸ் தொடரை அடிப்படையாகக் கொண்டு உருவாகும் திரைப்படம் இது. காமிக்ஸ் தொடரை அடிப்படையாகக் கொண்டு தயாராகியிருக்கும் ஐந்தாம் படம் இது என்கிறார்கள். 35 ஆண்டுகளில் முழுவதும் காமிக்ஸ் கதாபாத்திரங்களைக் கொண்டு தயாரிக்கப்பட்டிருக்கும் முதல் திரைப்படம் இது என்றும் சொல்லப்படுகிறது. அமெரிக்க காமிக்ஸ் ஸ்ட்ரிப்களில் பீனட்ஸ் மகத்தான வரவேற்பைப் பெற்றது. காமிக்ஸ் ஸ்ட்ரிப் என்பது நாளிதழ்களில் சில தொடர்ச்சியான சித்திரங்களில் வெளியாகும் படக் கதை. இதன் பிரதான கதாபாத்திரம் சார்லி ப்ரௌன். எத்தனை முறை தோல்விபெற்றாலும் அதைப் பற்றிக் கவலைப்படாமல் மீண்டும் மீண்டும் ஏதாவது புது முயற்சிகளில் ஈடுபடும் கதாபாத்திரம் சார்லி ப்ரௌன். குழந்தைகளை ஊக்கப்படுத்தும் வகையில் பாஸிட்டிவான எண்ணங்களை விதைக்கிறது சார்லி ப்ரௌன்.

சார்லி ப்ரௌன் தவிர அநேக சுவாரசியமான கதாபாத்திரங்களைக் கொண்ட இந்த பீனட்ஸ் படக்கதை இது வரை 21 மொழிகளில் மொழிபெயர்க்கப்பட்டிருக்கிறது. கோடிக்கணக்கானோர் இதைப் படித்து மகிழ்ந்திருக்கிறார்கள். ஆயிரக்கணக்கான பத்திரிகைகளில் வெளியாகியிருக்கிறது. இப்போது இந்தப் படக்கதை முழுநீளப் படமாகியிருக்கிறது. ஏற்கெனவே அநேக கதாபாத்திரங்கள் இருப்பதால் திரைப்படத்துக்கென புதிதாக எதுவும் கதாபாத்திரம் உருவாக்கப்படவில்லை. இதுவரை நாளிதழ்களில் வாசகர்களை ஈர்த்திருந்த சார்லி ப்ரௌன் கதாபாத்திரம் நவம்பர் மாதம் திரைகளில் புரியும் வேடிக்கை விளையாட்டுகளைப் பார்த்து வயிறுவலிக்க சிரிக்கப்போகிறார்கள் ரசிகர்கள். காமிக்ஸ் ஸ்ட்ரிப்பின் 65 ம் ஆண்டைக் குறிக்கும், கொண்டாடும் வகையில் இந்தப் படம் நவம்பர் ஆறாம் தேதி திரைக்கு வருகிறது.

அக்டோபர் 16 தி இந்து நாளிதழில் வெளியானது

கல்லுக்குள் ஈரம்

அவனும் அவளும் இடையில் இவனும்

அது ஒரு அழகிய கிராமம். தன் கதியில் இயங்கிக்கொண்டிருக்கும் அதன் சுபாவத்தைக் கிழித்து, புழுதி பரப்பி வாகனங்கள் விரைந்துவருகின்றன. கிராமத்தினர் ஆச்சரியத்தை வெளிப்படுத்துகிறார்கள். அந்தக் கிராமத்துக்கு தனது புதுப்படத்தைப் படமாக்க பரிவாரங்களுடன் வருகிறார் இயக்குநர் பாரதிராஜா. இப்படித் தான் தொடங்குகிறது நிவாஸின் இயக்கத்தில் வெளிவந்த கல்லுக்குள் ஈரம் படம். 

முழுக்க முழுக்க காதல் கதை என்றே சொல்லிவிடலாம். படத்தின் பிரதான கதாபாத்திரங்கள் காதியும் சோலையும். காதி அவ்வூரின் கூத்து வாத்தியாரின் மகள். சோலை சலவைத் தொழிலாளியின் மகள். இருவருக்குமே அம்மா இல்லை. நிவாஸின் படத்தில் பாரதிராஜா நாயகன் என்றால் பாரதிராஜாவின் படத்தில் நாயகன் சுதாகர். தன் காதலியைப் பிரிந்த நினைவுகளில் வாடும் பாரதிராஜா அந்தக் கதையை ஒட்டியே தனது படத்தையும் எடுக்கிறார். காதலியைப் பிரிந்த பின்னர் பாரதிராஜா வைராக்கியத்துடன் இயக்குநர் ஆகிவிடுகிறார். ஆனால் அவரது படத்திலோ நாயகனுக்குப் பித்துப் பிடித்துவிடுகிறது. 

படத்தில் பல காதல்கள் ஒன்றோடு ஒன்று பின்னிப் பிணைந்து கிடக்கின்றன. சோலை பாரதிராஜாவைக் காதலிக்கிறாள். காதி சுதாகரைக் காதலிக்கிறாள். அவ்வூரின் பள்ளிக்கூட வாத்தியார் காதியைக் காதலிக்கிறார். சோலையின் முறைமாமன் கறுப்பு அவள் மீது உயிராக இருக்கிறான், பித்துப் பிடித்து அலையும் சந்திரசேகருக்கும் சோலை மீது பிரியம். அவளது உடைந்த வளையலை எடுத்துப் பத்திரப்படுத்துகிறான். 

சோலை பாரதிராஜாமீது கொள்ளும் பிரியத்தை வெளிப்படுத்தும் காட்சி ஒவ்வொன்றும் புதிது புதிதான மலர்கள். பாரதிராஜா கோபக்காரர் என்ற பிம்பம் தான் அவளுக்கு. படத்தின் படமாக்கத்தின்போது அவள் காட்சியில் கவனிக்காமல் நுழைந்ததால் சோலையைப் பாரதிராஜா திட்டிவிடுகிறார்.  இப்படித்தான் அவளுக்கு பாரதிராஜா அறிமுகமாகிறார். மெல்ல மெல்ல ஒரு செடி வளர்வது போல் அவளுக்குள் பிரியம் கிளைவிடுகிறது. தான் அறியாமலேயே அதற்கு நீர் வார்க்கிறார் பாரதிராஜா. 

கிராமச் சூழலுக்குப் பொருத்தமான இசையை வாரி வழங்குகிறார் இளையராஜா. சில காட்சிகளில் பூவாய் வருடுகிறது சில காட்சிகளில் முள்ளாய் நெருடுகிறது. எந்தக் காட்சிக்கு என்ன தேவையோ அதை வழங்கும் இசை கல்லுக்குள் பசுமையை போர்த்திவிடுகிறது. சிறு பொன்மணி பாடல் படத்தில் பல கதாபார்த்திரங்களுக்கு பின்னணியாக ஒலிக்கிறது. படத்தின் அந்தராத்மாவின் உருக்கம் இந்தப் பாடலில் கலந்துகிடக்கும். பிரியங்களின் கிளையில் மலர்ந்து நிற்கும் மலர்களை இலக்கே இல்லாமல் பிடுங்கி எரிகின்றன சில பொல்லாத கரங்கள். ஏன் எதற்கு என்று எந்தக் காரணத்தையும் சொல்ல இயலாது என்பதைப் படம் சொல்கிறது. 

இது ஒரு யதார்த்தமான படம் என்று சொல்வதற்கில்லை. ஆனால் கிராம வாழ்க்கையின் பல யதார்த்தமான நிகழ்வுகள் படத்தில் பதிவாகியுள்ளன. ஆண் மீதான ஒரு பெண்ணின் பிரியத்தை இழை இழையாகப் பிரித்தெடுத்து மிருதேறிய ரசனையில் தோய்த்து காட்சிகளாக்கியிருக்கிறார் நிவாஸ். அநேகமாக அது பாரதிராஜாதான். ஏனெனில் படத்தின் டைரக்‌ஷன் மேற்பார்வை பாரதிராஜாவே. 

பாரதிராஜாவுக்கு மீனாட்சி பாட்டி வழியே கடலை தருவது, மலையடிவாரத்தில் இரவு முழுவதும் தனது தாவணியை அவருக்குப் போர்த்திவிட்டு குளிரில் நடுங்கியபடியே சோலை இரவைக் கழிப்பது, பாரதிராஜா தன் பெயரைக்  கேட்கும்போது அப்படியே உயிரே வழிந்து தன் மேல் விழுவது போன்று சோலை இளகுவது எனக் காதல் காட்சிகள் அனைத்தும்  பரப்பும் வாசம் நாசியை விட்டு எளிதில் அகலாதது.    

படத்தின் எந்தக் காதலும் கைகூடுவதில்லை. காதல் நிறைவேறா சோகத்தில் காதி தன்னை மாய்த்துக்கொள்கிறாள். இறுதியிலே சோலையும் பாரதிராஜாவும் ஒருவர் கையை ஒருவர் பிடித்து சந்தோஷத்தில் சஞ்சரிக்கும் வேளையில் பித்துப் பிடித்த சந்திரசேகர் பாரதிராஜாவைக் குத்திக் கொன்றுவிடுகிறார். இப்படித்தான் ஏதோ ஒரு மனநிலைபிறழ்வுக்கு ஆளானவனால் எல்லாக் காதல்களும் பிய்த்து எறியப்படுகின்றன. 

பாரதிராஜா - பாரதிராஜா

சுதாகர் - சுதாகர்

சோலை - அருணா

காதி - விஜயசாந்தி

கறுப்பு - ராமநாதன்

பள்ளிக்கூட வாத்தியார் - ஜனகராஜ்

சோலையின் தந்தை - கவுண்டமணி

2015 அக்டோபர் 4 அன்று இரவில் படத்தைப் பார்த்தால் இதை எழுத நேர்ந்தது. 

செவ்வாய் கிரகத்தில் மனித வில்லன்

ஹாலிவுட் பட ரசிகர்களால் கிளாடியேட்டர் படத்தை அவ்வளவு எளிதில் மறக்க முடியாது. இந்தப் படத்தை இயக்கியவர் ரிட்லே ஸ்காட். இவரது இயக்கத்தில் த மார்ஷியன் என்ற அறிவியல் புனைவுத் திரைப்படம் இன்று வெளி யாகிறது. த மார்ஷியன் என்னும் பெயரில் ஆண்ட்டி வெய்ர் எழுதிய நாவலை அடிப்படையாகக் கொண்டு இந்தப் படத்தை உருவாக்கியிருக்கிறார்கள். திரைக்கதையை ட்ரூ கோடார்ட் எழுதியிருக்கிறார். 

செவ்வாய் கிரகத்துக்கு ஆராய்ச்சிக்காகச் செல்கிறது ஒரு குழு. அந்தக் குழுவில் இடம்பெற்றிருக்கும் விண்வெளி வீரர் மார்க் வாட்னி. செவ்வாயில் இந்தக் குழு சென்று இறங்கிய பின்னர் கடும் பனிப் புயல் ஒன்று செவ்வாய் கிரகத்தைத் தாக்குகிறது. இந்தப் பனிப் புயலில் மாட்டிக்கொண்ட மார்க் வாட்னி அதனால் பயங்கரமாகப் பாதிக்கப்பட்டுவிட்டார். அவர் இறந்துவிட்டாரென எண்ணிய குழுவினர் அவரைக் கைவிட்டுவிட்டனர். ஆனால் மார்க் வாட்னி மரிக்கவில்லை. உயிருடன் இருக்கிறார். தனித்துவிடப்பட்ட நிலையில் மீண்டும் பூமியைத் தொடர்புகொள்ள முயல்கிறார். அவர் உயிருடன் இருப்பதை அறிந்து நாஸா அவரைக் காப்பாற்ற முயல்கிறது. ஆனால் அந்த முயற்சியைக் குழுவினரில் சிலரே தடுக்கின்றனர். தங்கள் குழுவின் ஒருவரைக் காப்பாற்றவிடாமல் ஏன் அவர்கள் செயல்படுகிறார்கள்? தடைகளை மீறி நாஸா மார்க் வாட்னியைக் காப்பாற்றியதா என்பதையெல்லாம் சுவாரசியமான காட்சிகளாகக் கொண்ட முப்பரிமாணத் திரைப்படம் ‘த மார்ஷியன்’.

இந்தப் படத்தை இயக்கியிருக் கும் ரிட்லே ஸ்காட் கிளாடியேட்டர், அமெரிக்கன் கேங்க்ஸ்டர், ராபின்ஹுட் உள்ளிட்ட பல பாக்ஸ் ஆபீஸ் ஹிட் படங்களைக் கொடுத்த இயக்குநர். படத்தில் மார்க் வாட்னி வேடமேற்றிருக்கும் ஹாலிவுட் நடிகரான மேட் டாமன், ஸ்டீபன் ஸ்பீல்பெர்க் இயக்கிய சேவிங் பிரைவேட் ரையான், த மெஜஸ்டிக், த டிபார்ட்டட், கிறிஸ்டோபர் நோலனின் இன்டர்ஸ்டெல்லர் போன்ற படங்களில் நடித்து பெருவாரியான ரசிகர்களைப் பெற்றிருப்பவர். இன்டர்ஸ்டெல்லர் படத்தின் மூலம் நன்கு அறியப்பட்ட நடிகை ஜெஸிகா சேஸ்டைன் படத்தின் நாயகியாக வேடமேற்றிருக்கிறார். இந்தப் படம் டொராண்டோ சர்வதேசத் திரைப்பட விழாவில் முதலில் திரையிடப்பட்டிருக்கிறது. பரவலாகப் படத்துக்கு ஆதரவான விமர்சனங்களே கிடைத்திருக்கின்றன. ஆகவே திரையில் படத்தைப் பார்க்கும் ரசிகர்களை இந்தப் படம் உற்சாகப்படுத்தும் என்ற நம்பிக்கை ஏற்படுகிறது.

அக்டோபர் 2 தி இந்து நாளிதழில் வெளியானது